Ti ki morti siparanu

Poi bu mon na dimeu
nu bai ti ponta-l mundu

pa nu purgunta Nhôr-Dês 

kantu tempu faltanu

Dipos nu bai na rubêra filisidadi

intchi nos condison 

ku si benson 

pa tempu ki restanu

Nu ta pasa pa undi vida spadja txoru

pa-n mostrou ma num ligria ka poku

tudu forsa ku mesti sta dentu-l bô

ma bu ka tem ki aguenta tudu bo sô

Bai ku mi ti porta morti

pô djudam lembra-l 

ma inda nos ora ka txiga

sa faltanu mas um dia

Pegam na mô nu bai

Ti la sim la

La undi ki distinu

ta chinta pa papia ku sorti

sta-m ma si nu djunta ku ês

nu ta ingana morti

Bem nu bai na garupa ventu

na meiu sabura ku tribulason

di hoji ti dia di nos bedjisa

di li pa nos disgrasa

                    C.D.

Realidadi di imigranti

Dja bu kustuma
fitxa odju ku kalma
e xinti kel dor dentu d'alma?
Lagadji pa pensamentu
ka bai na garupa ventu
e cori na direson di sufrimentu?
Contam di kel dia
ki bu fazi tudu ki bu podia
pa fingi um poku di alegria
mas lágrimas ta fujiba
ka tinha manera sukundiba
na kel momentu ki bu sa despidiba....
Si ka badu ka ta biradu
pelo menus si ki ta fladu
ma e sina di tudu koitadu
ki sa djobi liberdadi  :
bai e perdi felisidadi,
bai  infrenta sodadi...

                                 C.D.

Mizéria

Nunka n odja si rostu
e sta sukundidu na meiu mundu
e sta maskaradu na sukuru
na kel tchoru di mininu
na kel olhar xeiu disisperu

Nkonxel na stória ki kontadu
nreconhesel na um odju cheiu d'agu
tudu dia e ta vizita koitadu
sem respetu pa porta fitxadu

Ntem impreson ma el e mudu
se gritu ta konfundi ku silensiu....
e ta iziji tcheu sacrifisiu
e ta ataka sem nenhum avizu

E bem sima um castigu

poi guentis ta leba vida di impruvizu

es ta tenta distrail ku um sorizu

mas ka ta da pa disfarsa mizéria!

                                            C.D.

Homi di finata*

*Nha primeru poema na kriolu, como tributo a Kaká Barboza nha poeta Kabuverdiano preferido

Xintadu ta pensa na vida

inspirason tomal ser

sem avizu rabatal pensamentu

ku uns ideia ki intxil cunhisimentu

era mas ki projetu

era speransa em versu

odju ragalal na kabesa

kabesa intxil di ideas

e skrebel

fazel puema

e kantal

fazel morna

se dexadu

e ta fazel filmi!

Pamodi kela ke se rezan

el e poeta, homi di inspirason!

pa ta fasi finata cu finason

                                               C.D. (revisão por Alfredo Moreira)